Heng hmunah hian Lalremruata Chhangte Member Publicity Board & General Secretary GHQ chuan, “Central atanga sum hmuh ZPM sorkar hian a harsat tehlul nen, hmasawnna hnathawhna tur SASCI Part-1 , 2025-2026 atangin projects 41 atan vbc 328 hmuh a ni a, heta ṭang hian 66% an hmang hman a, UC submit mumal loh avang leh inthlahdah avangin 34% a lapse a, hmuh kir theihloh kal liam cheng vbc 111.52 lai a awm; Aizawl khawpui hmasawnna tura lapse zingah project 13 lai a awm,” a ti. Kum 2026-2027 SASCI guide lines-in a tarlan angin heng sum lapse-te hi a kum leha hman tura hmuhlet theih a nih loh thu a sawi.

“Sum enkawl thiam inti kan Chief Minsiter leh a puitu Adviser to CM hian an department enkawlah heti zat SASCI sum an ti lapse hi zahna chang hria se, Zoram hmasawna tur an tih ṭhuanawp hi a nasa takzet a, mipuiah ngaihdam an dil ngei tur a ni, an mawhphurhna hi midang kutah dah ngam bawk rawh se,” a ti bawk.

Lalremruata Chhangte chuan, “SASCI sum tih lapse avang hian hmasawnna in a tuar a ni mai lova, heng projects atanga Mizoram sorkar-a labour cess an chhun luh tur nuai 111.52 a bo phah bawk a, central leh state chan tur GST cheng nuai 2007.36  a bo vek phah a, kan pawisa hloh hi a uihawm tham takzet a ni,” a ti bawk.

Dohranga Vice Chairman, Local Council Chawnpui pawhin ZPM sorkar hnuah Chawnpui Primary school sakna tur cheng nuai 18 chuang leh Seventh Day tlang pan chhohna step siamna tur cheng nuai engemaw zat an tih lapse bakah, MHIP building sakna tur an tih zuzi vek thu a sawi a. Primary School sakna tur lapse hi sikul naupang 240 vel hian nasa takin an tuar mek a, an sikul hi namen lovin a chep a. Tunah an lo nghah fak em em Market sakna tur heti zat a lapse leh avang hian khawtlang mipui kan rilru a na em em a ni, a ti.

Thanpara, Adviser, MNF Unit Chawnpui pawhin Chawnpui veng pumin kan tangkai pui em em tur, Chawnpui veng rohlu Bazar tur a lapse hi kan tuarna hle a, pawi kan ti takzet a . A bang tlemte la awm hi thil dangah ZPM sorkar hian min pawhpen sak tawh lo se kan duh hle a ni, a ti.